Ilkoll ħassejna l-effetti tal-COVID 19 fuq is-soċjetà u l-ekonomija tagħna. Biex tnaqqas ir-riperkussjonijiet fit-tul tal-pandemija u tgħin lil pajjiżek jirkupra aktar malajr filwaqt li jkun aktar reżiljenti kontra kriżijiet futuri, l-UE ħolqot strument ta’ rkupru ta’ €800 biljun. “Next Generation EU” jagħmel il-fondi disponibbli permezz tal-Faċilità għall-Irkupru u r-Reżiljenza (RRF). L-għan ġenerali huwa li jiġu mmodernizzati l-ekonomiji tal-UE permezz ta’ sett ta’ objettivi ewlenin, inkluż l-iffaċilitar tat-tranżizzjoni lejn futur aktar sostenibbli u diġitali, kif ukoll il-ħolqien tal-impjiegi.

X’tista’ tagħmel l-UE?

Il-baġit tal-UE jiġbor ir-riżorsi tagħna biex jiffinanzja prijoritajiet u sfidi kondiviżi tal-UE bl-għan li l-poter tal-infiq ta’ 27 pajjiż ikun aktar effiċjenti u effettiv. L-għan huwa li ħajjitna tittejjeb fuq terminu twil ta’ żmien, billi jgħin biex jinħolqu l-impjiegi, tittejjeb l-edukazzjoni u tissokta l-ġlieda kontra t-tibdil fil-klima, fost objettivi oħra. Fi żminijiet ta’ kriżi, l-UE tista’ wkoll iżżid l-isforzi tagħha, kif għamlet matul il-pandemija. Tista’, pereżempju, tuża l-baġit tal-UE biex tappoġġja s-self konġunt. Minħabba l-klassifikazzjoni għolja tal-kreditu tagħha, l-UE ġabret fondi taħt termini favorevoli biex tiffinanzja l-istrument storiku tagħha Next Generation EU (NGEU), fil-qalba tal-irkupru tal-UE.

X’għamlet l-UE s’issa?

L-UE ħolqot Next Generation EU biex tgħin lis-soċjetà tagħna tirrispondi għax-xokk ekonomiku tal-pandemija. Dan jippermetti lill-pajjiżi tal-UE jużaw il-biljuni ta’ euro disponibbli f’għotjiet u self sal-2026, biex jgħin fil-bini mill-ġdid ta’ UE aktar sostenibbli, diġitali, inklużiva u reżiljenti. Għar-riforma u l-investiment stabbiliti fil-pjan nazzjonali ta’ rkupru tiegħu, kull pajjiż tal-UE jirċievi finanzjament mill-Faċilità għall-Irkupru u r-Reżiljenza (RRF), l-għodda ewlenija użata biex jiġi investit il-finanzjament. Dawn il-fondi huma mistennija li jagħtu spinta lit-tkabbir ekonomiku fit-tul billi jiffinanzjaw objettivi kondiviżi tal-UE biex nimxu lejn soċjetà aktar favur l-ambjent u diġitali. L-adattament tas-suq tax-xogħol għall-isfidi futuri u l-ħolqien ta’ impjiegi ġodda huma wkoll uħud mill-objettivi ewlenin.

Madankollu, jista’ jkollok bżonn ħiliet ġodda biex tapplika għal dawn l-impjiegi. Għalhekk miżuri oħra fil-pjanijiet nazzjonali joffru appoġġ għan-nies biex jagħmlu tranżizzjoni lejn setturi u tipi ta’ impjiegi ġodda, ħalli jiżviluppaw il-ħiliet tagħhom u japplikaw għal impjiegi stabbli ta’ valur għoli. Il-biċċa l-kbira tal-miżuri relatati mal-impjiegi jiffukaw fuq it-titjib tal-programmi tal-gvern biex jgħinuk issib xogħol jekk inti diżokkupat, biex tgħin persuni sottoimpjegati jew biex is-servizzi pubbliċi tal-impjiegi jsiru aktar effiċjenti. Dawn għandhom l-għan li jintegraw aħjar liż-żgħażagħ, in-nisa u l-gruppi vulnerabbli fis-suq tax-xogħol. Il-pjanijiet jirrikonoxxu li llum il-ħiliet tan-nies għadhom ma jaqblux mad-domanda tax-xogħol. Ħafna mill-investiment għandu jgħin lin-nies jiksbu ħiliet ġodda (speċjalment dawk diġitali), u għalhekk il-forza tax-xogħol tal-UE hija lesta għall-ħtiġijiet attwali u futuri tas-suq tax-xogħol. Ħafna pajjiżi beħsiebhom jużaw il-finanzjament biex iżidu t-tagħlim għall-adulti, inklużi l-edukazzjoni u t-taħriġ vokazzjonali kontinwi, kif ukoll biex jipprovdu aktar programmi u programmi aħjar ħalli jgħinuk ittejjeb il-ħiliet tiegħek jekk inti qiegħed, jew biex tibdel il-karriera kompletament. Iż-żgħażagħ li qed ifittxu impjieg se jibbenefikaw minn gwida dwar il-karriera, sussidji għat-tiftix ta’ ħaddiema u opportunitajiet ta’ traineeships.

Programm ieħor iffinanzjat mill-NGEU huwa l-assistenza fl-irkupru għall-koeżjoni u għat-territorji tal-Ewropa (REACT-EU). Dan jgħin fil-ħolqien u ż-żamma tal-impjiegi u jippromwovi l-iżvilupp tal-ħiliet. Fil-bidu tal-2020, meta ħafna nies tilfu l-impjieg tagħhom minħabba l-COVID‑19, l-UE pprovdiet ukoll lill-gvern tiegħek aċċess immedjat għal fond temporanju ta’ kriżi li kien jammonta għal €100 biljun. L-għan ta’ dan il-fond kien l-Appoġġ biex jittaffew ir-Riskji ta’ Qgħad f’Emerġenza (SURE). Jista’ jkun li bbenefikajt minn dan int stess, peress li kien iffinanzja skemi ta’ xogħol għal żmien qasir fis-setturi tal-impjiegi l-aktar milquta. SURE ippermetta lill-kumpaniji jżommu lill-impjegati u lill-ħaddiema li jaħdmu għal rashom biex iżommu n-negozju għaddej u b’hekk ġew salvati 40 miljun impjieg madwar l-UE. Minkejja previżjonijiet negattivi, il-miżuri f’waqthom tal-UE kkontribwew għal irkupru ekonomiku rapidu.

X’inhuma l-isfidi li jmiss?

Filwaqt li n-Next Generation EU jappoġġja l-irkupru u t-tħejjija ta’ pajjiżek biex jiflaħ għal kriżijiet futuri, il-fond huwa temporanju u l-isfidi li ġejjin ukoll jeħtieġu investiment sinifikanti wara l-2026. L-UE se taċċellera t-tranżizzjoni lejn soċjetà aktar sostenibbli u diġitali u futur “ekoloġiku” jista’ jfisser eluf ta’ impjiegi ġodda. Iżda huwa meħtieġ l-appoġġ, inkluż għal persuni li jkollhom ibiddlu l-impjieg. Diġà jidher nuqqas ta’ ħaddiema tas-sengħa f’setturi “ekoloġiċi”. Meta wieħed iħares lil hinn mill-ħajja tal-RRF, jeħtieġ li l-UE tkompli tiffinanzja dawn il-prijoritajiet biex tiżgura li ħadd ma jibqa’ lura.