Bíonn imeachtaí coiriúla roimh níos mó ná 9 milliún duine san Aontas gach bliain. Leis na milliúin saoránach ag gluaiseacht faoi shaoirse ar fud an Aontais, bíonn cuid acu ina n-amhrastaigh nó cuirtear coireanna ina leith agus iad lasmuigh dá dtíortha dúchais.

Cuireann an tAontas Eorpach de cheangal ar na Ballstáit na híoschearta nós imeachta céanna a dheonú do gach duine a bhíonn faoi dhrochamhras agus do gach duine a gcuirtear coir ina leith in imeachtaí coiriúla. Cuidíonn sé sin le cearta daoine aonair chun triail chothrom a fháil agus cóir chomhionann a bhaint amach, is cuma cén áit san Aontas ina bhfuil siad.

Má tharlaíonn sé go mbíonn ort dul os comhair cúirte i dtír eile san Aontas, cosnaíonn dlí an Aontais an ceart chun ateangaireachta saor in aisce le linn ceistiúcháin, éisteachtaí cúirte agus cruinnithe le dlíodóirí agus an ceart aistriúchán i scríbhinn de dhoiciméid bhunriachtanacha a fháil, amhail na líomhaintí atá curtha i do leith. Faoi dhlí an Aontais, tá sé de cheart agat eolas a fháil faoi líomhaint, chomh maith leis an gceart fanacht ciúin. Go pras tar éis tú a chur faoi choinneáil, tá tú i dteideal doiciméad atá éasca le léamh a fháil ina bhfuil faisnéis faoi do chearta nós imeachta.

Má ghabhtar thú, tá an ceart agat duine a chur ar an eolas faoi sin agus teagmháil a dhéanamh le do mhuintir agus le do chonsalacht. Cosnaítear an ceart ar dhlíodóir faoi dhlí an Aontais. I ndlí eile de chuid an Aontais, leagtar amach na critéir maidir le cúnamh dlíthiúil a dheonú in imeachtaí coiriúla, ionas gur féidir leat comhairle dlí a fháil mura bhfuil tú in ann íoc aisti. Ní mór d’údaráis náisiúnta toimhde na neamhchiontachta a chinntiú mar aon leis an gceart a bheith i láthair ag do thriail féin. Ar deireadh, tá cosaintí speisialta ann do leanaí a bhfuil amhras ann go ndearna siad coir agus a gcuirtear coir ina leith.